الحوامل في الشهر التاسع و النافس

مرحبا بكم في الجزء الثاني الخاص بالنافس
**بسم الله الرحمن الرحيم **
اولا الحمد لله على سلامه كل النسا اللي ولدو والعاقبة للي مازالو

ان شاء الله مانفوقوش نلقاو ارواحنا ولدنا وبيبياتنا بين يدينا بصحة وعافية
اللي رايحة تولد في وقت البرد كيما انا لازم توجدي فيزوات ولا سراويل نتاع القاطيفة وسليبات باش يشدولك البوندا وتلبسي فوقهم الفيزو والسروال ولا القندورة نتاع القاطيفة ولازم راكي دايما مغطيا راسك لازم اديري خمار قليظ
وادهني رجليك بالفازلين رويال و ديري دقاشر
نبداو بالوصفات اللي يديرو الحليب في الصدر
-ديري الراس نتاع المعزة او النعجة يطبخ بعدما يتنظف مليح يعني يشوط ويتنقى طيبيه ومعاه التمر و الهرماس وشوية فلفل حار اللي معدتها صحيحة ومن بعد ما يطيب مليح يعني يتفسخ في الطياب
تاكليه وتشربي المرق نتاعو
_الطعام اللي هو الكسكس ديريلو حليب
كانديا مكان المرق وكوليه .
- ياؤورت عادي سكرفجي حبة تفاح او اجاص فيه وخلطي وبصحتك
-مردود النافس اللي هو مردود عادي بصح دايرين فيه حرور النافس يعني كي يجو يفتلوه يديرو في السميد هاذ الاعشاب ::فنجال عرعار مرحي فنجال عفص مرحي فنجال قرطوفة فنجال اكليل مرحي فنجال زعتر مرحي فنجال كمون ابيض مرحي
فنجال حلبة مرحية تخلطيهم مع السميد وتفتلي المردود عادي و طيبيه مع اللحم الغنمي او الدجاج وديريلو السكر انا درتو بعد شهر من ولادتي لان المعجنات ممنوعة على اللي دايرة عملية
او تقدري طيبي مردود عادي و تذري عليه هاذ الاعشاب وتاكليه
هاذ المردود هايل يدير الحليب ويصفي الرحم
-زريعة الكتان المرحية ملعقة صباحاً ومساءا مع كاس ماء
-غلي النعناع مع الكسبر حبات غليهم حتى يصفار الماء نتاعهم واشربي كاس صباح وكاس العشية روووعة حتى المصران يبرا الا حكمك
وكاينا هاذ الوصفات شفتها في هاذ المنتدى

قلي ملعقتين حلبة في ملعقة زبدة على نار قليلة حتى يتبدل لون الحلبة زيديلها كاس ماء وخليها طيب على نار قليلة
كي تشوفيها نقصت والحلبة طابت
زيديلها كاس حليب مذوبة فيه ملعقه فرينة وملعقة سكر وانتي تصبي خلطي مليح حتى يخثار وزيديلها قرفة مطحونة
-اي نوع تاع تيزانة زيديلها عود قرفه وغليها حت يحمار الماء نتاعهم غطيها خليها تبرد 20 دقيقة صفيها واشربيها
كاس الصباح وكاس العشية
و لازم شرب الماء على الأقل لتر في اليوم
كاين بزاف وصفات بصح الموضوع يكون طويل بزاف
**نجو للبيخة ... البيخة كل عايلة عندها لبيخة خاصة انا نقلكم اللي درتها انا
خدمتهالي امي الغاليه ربي يحفظها مكوناتها ::كاس تمر منزوع النوى نص كاس زيت الزيتون دافئ تعجنيهم مليح وتزيديلهم كمون اسود مطحون و حرمل مطحون شيح مطحون تعجنيهم مليح الا لقيتيها ناقصة زيت زيتون زيديها شوي و لفيها في شاش و حطيها على راسك تكون بالطبع دافية ... تقدري تخبيها مش رايحة تفسد انا شهر وانا ندير فيها لان ولادتي كانت في الشتاء كلما نديها نحس براحة نفسية هايلة
المراة النافس لازم تغطي راسها حتى ولادتها في الصيف و حذاري من الكليماتيزور موش مليح للرحم والراس تاني
**الخياطة نتاع الولادة ::انا صراحة ماجربتهاش لاني ولدت قيصري لذا ماعنديش فكرة عن آلامها ومدة الشفاء بصح عندي قريباتي داروها وقالو العملية اسهل من الولادة الطبيعية بسبب الخياطة
نقلكم واش دارو حتى براو طبعا الغاسول اللي يعطوهلك لازم اديريه لانو ينقي الرحم من الداخل ويمنع تكاثر البكتيريا
الخلطات اللي نسمع بيهم واللي جربوهم قريباتي ::
-غلي عشبة الخياطة تلقايها عند العشاب
وصفي الماء نتاعها دريه في قرعة وزيديلها الشب المطحون و الملح و صابون حجرة حنا عندنا صابون الجيراف مسكرفج خلطيهم مليح وين تكوني رايحة تواليت اديها معاك استنجاي بيها ونشفي وادهني بزيت زيتون
-الدباقة تلقايها عند العشاب كاينة تتباع مطحونة بصح اللي تخدميها انت احسن
غليها مليح وصفيها واستنجاي بيها
في الاخير نقلكم ربي يسهل علينا ان شاء الله واللي عندها وصفة ماتبخلناش بيها