اليوم نحكو على العجوز و الكنه

سلام كشروداتي موضوع اليوم للي سقساوني كيفاه نتعاملو مع العجوزة و بناتها هاني جيتكم اليوم .......اليوم نحكو على العجوز و الكنه ............ كاين بنات تشوف بلي العلاقه بين هذو الزوج علاقة حرب و اغلب الناس تخمم هاك هذا الشيء كامل كي رانا نسمعو للحكايات المزوجين تقول انا عجوزتي مصيبه .انا عجوزتي قنبله ذريه .انا عجوزتي ما تحبنيش و ديما ديرلي مشاكل و من بعد هذا الشيء اللي تسمعو الوحده فينا تلقاها توجد في روحها باش تبدا هذي الحرب اللي سمعت عليهاا نهار اللي تدخل الطفله لدار راجلها ما تتهناش بهذي الطريقه لخاطر قلبها ديجا من الاول مش صافي للعجوزتها و بناتها كذلك و تبدا تلوح فالهدرة و تعراش غير على دورة و غير تسبب و اللي تصرا كامل تقراها نقص و تبدا تشتكي و تبكي لدارهم ليماها لاخواتاتها و حتى صحاباتها و تشيخ على البنات اللي مزال ما زوجوش كيما صرالها هي قبل ما تزوج تقولك عندك و بلاك تزوجي و تسكني مع عجوزتك و بناتها و تصورلها بلي عجوزتها غوله ما نكدبوش على رواحنا كاين عجوزات ربي يهديهم بصح لالا انت ثاني كوني حاذgه مع روحك حاولي كيفاش تكسبيها و تربحي دعاوي الخير منها ليك و لاولادك فالمستقبل ديري في بالك* دعاوي الوالدين تحصل فالذريه* و ماذا بيك تكوني مدعية بالخير باش وليداتك يتهناو في حياتهم هنا وصلنا للمفيد خممتي كاشما نهار كيفاه تكسبي راجلك و اهلو عجوزتك و بناتها و حتى سلفاتك ؟ خممتي كاشما نهار كيفاه تبدلي العقليه نتاع خايفه منهم و كيفاه تخليهم يحبوك و قادروك .....هي لازمك تصبري شوي و ساعات بزاف الله غالب ما عندكش حل بصح هذي الحاجه تستاهل العناء ... اول حاجه نحي من راسك الافكار اللي حكينا عليهم قبيل كامل و نحي من بالك باش تدي الراجل ليك وحدك و بعديه على مواليه بدليها بفكرة راكي رايحه لدار عيال لازم ديري بلاصه بيناتهم و تكوني وحده منهم و فيهم شوفي يا المكشردة نتي و ياها اعرف قبل عيوبهم زعما غيارين نحاول مل نحكيلهش و ما بينلهمش راني لباس عليا ما يحبوش التفنين نبينلهم بلي انا قافزة ما يحبوش اللي تصبح.. نوضي بكري و عاودي قيلي عادي مش راح يزيد النوم في عمرك ............ الخ و كل وحده و شطارتها ..و حاولي ثاني تستفادي من مميزاتهم يحبو الهراج و الضحك نريح نقصر معاهم و نضحك معاهم مش تروحي الحبس الانفرادي و تسكري على روحك في شمبرتك يحبو المعاونه كي تلقايهم كاشما يقضو دخلي روحك مش حتى يعيطولك و تولي انتي تشنفي عليهم عاونيهم منك ليك و اذا قالولك لالا احسن هاكي تهنيتي و ربحتي قدرك معاهم ..........الام الام الام و هي العجوزة ...تحب ديما تشوف بقدرو مرتو محترماتو و مقادراتو تسمع كلام راجلها و دايرتلو قدر قدام مواليها و مواليه ثاني هكذا حتى عجوزتك تقادر و تولي تضرب معاك نتاع الصح ..و اهمتي بعجوزتك و بناتها اللي مزوجه كي تجي عندكم ضيفيها مليح ماكله مليحه و ضحكه و بسطه .. حتى تروح مش رايحه تسكن عندك و اللي فالدار صاحبيها ادي و جيبي معاها فالحكايات حتى التافهه على الاقل اسمعيلها ..هنا نصيحه احكي معاها بعيد على امورك الشخصيه الزمان دوار كاشما نهار تعايرك بيها و لا تحكي بيك للناس ...حلي عينك ... مثلا رايحه طيبي سقسيهم كيفاه طيبوهذي و ذيك على بالي بيك قافزة و تهني بصح ما عليهش * راني فاطر غير ما خذت خاطر * و راكي كبيرة و تفهمي ......حابه تبدلي ديكور نتاع الدار شاوريهم اذا قالولك ايه تهنيتي و اذا قالو لالا اضربيها بضحكه و قولي نكسرو روتين برك هذي السمانه و الا ما عجبكمش نرجعو عادي ....و انت و حلاوة لسانك يا حبيبتي *اللسان الحلو يرضع اللبه *.... الخ و هكذا يحسو بلي راكي مقيمتهم الفايده و الحصول ركزي على النقطة الجاية تجنبي الخلافات مع عجوزتك على ابسط الامور هذاك الجهد و اذا لقيتي روحك ضاقت بيك و حشراتك بالهدرة مهما كان سبب نتاع العفار حاولي تنقصي الهدرة و نقصي صوتك و ما تبدايش تعاندي فيها كلمه منك و كلمه منها و تلوحي فالهدرة بالعربيه * السكات فيه الفوايد * لخاطر كون تزيدي معاها غير شوي راه يتعمر قلبها من جيهتك و حتى و تتفاهمو تبقى ديما متفكراتك بالشينه راني قتلك و انتي دبري راسك يالكحلوشه و حاجه اخرى و اهم من اللي فات كامل قد ما يصرا بين راجلك و مواليه امه و اخواتاتو و لا حتى الاب نتاعو بيناتهم بنهم زين ليهم شين ليهم المهم انتي تخطي راسك يالمكشرده............. اكيد فالتالي رايحيين يتفاهمو و كون دخلي روحك انتي ينساو وش دار بنهم اللي هو راجلك و يتفكرو غير وش درتي انتي معاهم يا الحابسه هاك تكوني ربحت غير العيب معاهم و في النهايه كشروداتي راني طولت بصح الموضوع يستاهل الكلمه الطيبه راها هي السحر نتاعك و الضحكه هي دواك مهما يكونو اهل راجلك ماشي ملاح كوني انتي مليحه و هكذا يرضى عليك ربي و العبد طولي و لا تقصري ربي راه حق و ربي مايضيعش حقك لا فالدنيا لا في الاخرة تنوضي الصباح صبحي عليهم بالواحد و اضحكي راني شايفه كاين نساء كي نوضو من النوم يفسدو ليك نهارك كامل و كي جوك ضياف اضحكي في وجوههم حتى و تكون مرنكا عليك و مش من قلبك اربحي اجرهم و زيد مرة على مرة تفكري عجوزتك بكاش كادو جيبيلها قرعة نتاع ريحه و فالعيد روبة و الصيف ولا شتاء تفكريها بقطيعه قماش.....الخ و لا حتى كي تروحي للداركم جيبيلها حاجه معاك قوليلها بعثتهالك يما و لا شريتهالك ....الخ.................. انتي و الحاجه اللي قدرتي عليها و الرسول عليه الصلاه و السلام يقول تهادو تحابو و ماذا بيك ديما ديري واجبك مع الاهل نتاع زوجك القراب و البعاد اللي عرس روحي ليه و اللي جاتو مصيبه الله يبعد علينا اوقفي معاه ......الخ الواجبات راها بزاف ...و فالاخير اهل راجلك هوما اهلك هوما ناسك بعد داركم هوما اهل اولادك و خمي لبعيد مش غير عند رجليك
كيما وعدتكم راني جبتلكم اذا كاشما نسيت فكروني و الا كاشما غلطت اسمحولي ... بصح ادعولي حبيباتي و كشروداتي نحبكم