اللسان الحلو (( كيف يكون ودوره في الحياة الزوجية وفترة الخطوبة ))

اللسان الحلو (( كيف يكون ودوره في الحياة الزوجية وفترة الخطوبة ))

الموضوع هذا رووعة ومفيد ليكم كامل عازبة ,, مخطوبة ,, ومتزوجة
العازبة تتعلم وتوجد روحها باش تسعد زوجها
والمخطوبة تبدى تحظر روحها وتطبق لكلام باش تتعود عليه
والمتزوجة ممكن راهي مطبقة نصف هاذ لكلام الي نقولو ولازم تزيد الباقي
قاللها حمارة سبها في لحظة غضب شوفو رد اثنين من الزوجات على أزواجهن :
" وسامحوني على الكلمة "
الأولى صاحبة اللسان الحلو والذكية (( شوفو كيف تعاملت مع الموقف )) :
في لحظة غضب صرخ عليها زوجها لأنها زعفاتو ودارت عكس كلامو وقاللها حمارة
ردت عليه قائلة بدلع والبسمة تعتلي وجهها : نو نو انا ماشي حمارة انا زوجتك حبيبتك غاليتك وعمرك وبنيتك الصغيرونة الي تغلط
وروحك ودنياك وسعادتك وهناك وفرحك وشقاك وماضيك وحاضرك وروح بين يديك تحافظ عليها وتحميها
اعتلت البسمة في وجهو وفرح واحتار وحس بإحساس انو امتلك أجمل واهدأ وأنعم وأكثر نساء دلعاً في الدنيا
وقاللها اجري لعندي
وهاذي الثانية الي ما تعرفش كيف تكسب زوجها :
قاللها حمارة في لحظة غضب
تلون وجهها وبدات خدودها تنتفخ وصرخت في وجهو اذا انا حمارة انت .... وكتمت كلمة كانت رح تطلقها كالقنبلة وهو يقوللها كملي كملي .. وراكم عارفين مع التقلاق والغضب كيفاه يولي الواحد .. . وهي غاضها الحال وقعدت تبكي وهو خرج وغلق الباب بقوه .. وجلسو متخاصمين مدة من الزمن
السر في الموقف :
الأولى عرفت انو من خوف زوجها عليها ومن حبو ليها يزعف منها ومن كثر ما غضب قالها هاك وماشي بقصد .. صغرت الكلمة وردت عليه بأجمل وأرق رد .. تصالحو في ذيك اللحظة وفي كل موقف تعمل نفس الشي .. تحاول ما تخليش الشيطان يدخل بينهم
عكس الثانية الي طول دخلت الوسواس لروحها وكانت على حافة انها تنطق بكلام ممكن يدمر حياتها .. في لحظة غضب الي ممكن تندم عليها حياتها كاملة
هذا كان كمثال فقط باش تدو نظرة على الموضوع قبل ما نتعمقلكم فيه ^^
ندخلو في الموضوع باسم الله :
كلكم فاهمين وش معناه اللسان الحلو أكيد الكلام اللبق والحلو والدلع والإحترام ... وغيرها من الكلمات الي أول ما نسمعوها تدخل قلبنا على طول .
ننتقل لِـ كيف يكون اللسان الحلو ؟
المرأة الذكية تعرف كيف تكسب زوجها من خلال تعاملها وطريقة كلامها معاه , مهما كانت ذات جمال ولسانها سليط ولعين ينفر منها زوجها مع الوقت ويمل منها ومن طريقة كلامها معاه , ومهما كان جمالها متوسط ولسانها حلو وعارفة كيفاش تكسب قلب زوجها تلقايه يحبها ويموت عليها وما يتخلاش عليها مهما كان .
اعتبري كلامك لزوجك صدقة , لأن الكلمة الطيبة صدقة ,و الإبتسامة صدقة , زوجك بعد يوم طويل من العمل يجي يدخل للبيت أكيد يكون منتظر انو يرتاح في بيتو انك تدلعيه وتهتمي فيه وتريحيه وتعتني بيه .. ماشي كي يرجع للمنزل يلقاه مقلوب وانتي تصرخي على هذا وعلى ذاك من أولادك ومن يدخل تبدى طلباتك وتذمراتك .. أكيد يتعب ويمل وتتدمر نفسيتوويروح يدور مكان يرتاح فيه
لكن اتخيلي لو يدخل للمنزل تجيه تقابليه بإبتسامة و تدعيلو ان الله يحفظولك ويحميه ويقويه وتحكمي الأغراض الي في يدو تحطيها في المطبخ وتلحقيه للغرفة تعطيه ملابسو وتهللي بيه : يا اهلا بالغالي الي ما ينور البيت الا بوجودو .. عسى الله يديمك عليا من نعمة يا روحي .... أكيد الرجل بهكذا كلام يعشق بيتو ويولي يخمم غير ويكتا يرجع للبيت وتكوني جنبو وتسعدي قلبو وتريحيه من تعب يومو
اللسان الحلو يلعب دور كبير في الحياة الزوجية
مهما كان واش جابلك معاه سواء شي بسيط ولا غالي اشكريه وخلي عيونك تظهرلو الفرحة .. وقلو تعيشلي يا الغالي وتجيب أكثر ربي لا يحرمني منك ماك منقص عليا بوالو حتى لو منقص عليك .. لانو بهكذا كلام تعلميه انو مهما كان ما يبخلش عليك وما يحسش انك ناكرة للمعروف مهما كان صغير .. وخاصة الي زوجها فقير فوق الفقر والهم الي حاملو فوق ظهرو وانو نهار كامل يخمم كيفاه يسعدك ويحاول يفرحك وينسيك في الهم تخيلي يدخل للدار ويزيد فوق الهم تزيدي عليه الهم بكلامك وتصرفاتك معاه .. والله لو يدخل عليا بحبة جزر في يدو نبوسلو يدو ونقولو يكفيني وجودك معايا والله مجرد كلمة انك متزوجة من راجل وانو هو سند وفخر ليك راهي تسوى الدنيا وما فيها وياسر نساء راهم محرومين من سند بجنبهم

ماشي المفيد في غلاء واش جاب باسك مهما كانت غالية رح تزول المفيد في ردة فعلك الي تكتب لك كأجر عند ربي عظيم ان شاء الله و رح تبقالو ذكرى طول عمرو واكيد المتزوجات رح يأكدو على كلامي الراجل عمرو ولا ينسى معروف دارتولو الزوجة تاعو مهما كان بسيط ... حتى لو ما يبينلكش وما يقوللكش هاذ الشي لكن نهار تكوني معروضة في بيت اهلك ويكون وحدو في المنزل يبدى يتذكر في كلامك تصرفاتك ... خليه يدعي في غيابك في انو ربي يحفظك ليه ويديمك عليه ويرزقك وإياه الجنة .. وما تخليهش يدعي في غيابك عليك ويحاول يرسم مكائد باه يتخلص منك ويلعنك وتلعنك الملائكة ويغضب عليك ربي سبحانو

مهما كان بنات ما تستهونوش بالكلمة الطيبة .. حتى في لحظات غضبك اتكلمي معاه بثقل بحيث تبينيلو انك زعفانة لكن ما تحرميهش من كلمة حبيبي وزوجي الغالي وو .. لانها رح ترقق قلبو عليك وتحسو بذنب غلطتو ويندم الي زعفك ويحاول يبعد اي شي يزعفك في المستقبل .. عكس لو تكوني متعمدة تناديه بإسمو وتشنفي عليه وتشوفي فيه بنظرات حقد وكراهية يولي يقول يا لطيف وش سلطها بيا هاذ المصيبة ههههه

ان شاء الله تكون النصائح فادتكم ونطلب من الأخوات المتزوجات الي عندها إضافة تفيد بيها لبنات وخياتها ما تبخلناش وربي يسعدكم ويهنيكم الجميع ويجعلكم من نساء الجنة يــــــآآآآآآآآآ رب

انتظروني مع كل جديد خياتي والله اني نحبكم في الله ونتمنالكم كل خير
رجاءاً الي تنقل الموضوع لمنتدى آخر تكتب بقلم klodia26_dz او على الأقل تكتب منقول لانو والله كتبت الكلام حرف حرف
الموضوع متعوب عليه وحصري