قصة واقعية مؤلمة و في نفس الوقت عبرة لبعض الفتيات

السلام عليكم حباباتي
اليوم حبيت نحكيلكم قصة واقعية مؤلمة و في نفس الوقت عبرة لبعض الفتيات كما اريد رايكم بخصوص الموضوع
هادو عامين فاتو على النهار لي تزوج فيه جارنا و جاب عروسة صغيرة 19 سنة من مدينة اخرى بين الخطبة و العرس 4 شهور فات العرس فرحنا و شطحنا المهم سكنت العروسة مع عجوزتها انسانة كبيرة و مريضة و في بالها العروسة باه تعاملها كيما امها و زيد مريضة مسكينة كانو هادو جيرانا من اقرب الناس لينا و دار وحدة كانت هاد العروسة قدي فالعمر حبيت نتعرف عليها و ماما قاتلي الطفلة بعيدة على دارهم منخلوهاش تحس بالغربة انا اول مرة رحت طفلة متعرفني منعرفها غير كملت خدمتها طلعتني لشومبرتها و بدات تحكيلي عالباسي تاعها مع حبيبها و كيفماه سمح فيها و تقولي ادا عندك حبيب متفرطيش فيه و حكايات ستغربت اني نسمعهم من عروسة معندهاش شهر زواج انا روحت و خليت لحكاية بيني و بينها و مع الايام كنت نتلاقا معاها تحكي غير على حياتها قبل الزواج مع انو راجلها متل اخي و الله نعم الناس و صغير و الف من تتمناه مي هي كانت تهدرلي فيه و تسبو و تحكي غير على صاحبها و ماحبستش عند صاحب واحد كانو بزاف و هي تحكي ما كانتش خايفة حتى من حاجة و زادت عرفتني بلي منحكيش انا قلت بلاك تأترت گي ماداتش حبيبها و جاتها صدمة مع الوقت تنسى مي مرة فالعيد رحت عندها لقيتها قافلة الباب طبطبت فتحت و قاتلي ادخلي و قفلت الباب لقيتها فرحانة و تدحك و تحكي فالتلفون كي كملت قاتلي ادا حبيبي عيطلو اليوم و مازالو يحبني شوكاتني حاولت نقنعها بلي ادا الشي حرام مي مسمعتش مني كانت تحكي معاه كل يوم و كي عرفت روحها بالحمل توصلت انها شربت اعشاب باه تسقط الحمل و قاتلي متقوليش مسكين راجلها يحب لولاد و هي حرماتو منهم بلاك تستغربو و علاش بقيت مصاحبة وحدة فاجرة كيفها و الله حتى انا معرفتش السبب المهم گ مرة نبعد عليها نزيد نرجع نهدر معاها نورمال و فاتو الايام بعد ما سقطت و رجلها يجري بيها من طبيب لطبيب و معلبالوش بلي هي لي قتلت ولدها باه ترضي صاحبها لي كانت كل وين تروح لدار باباها تتلاقا بيه و ماشي نتاهم فيها حكاتلي بفمها وش كانت دير معاه و لي حلمت ديرو معاه و العياذ بالله ...... فات عام على زواجها و صاحبها بعد ما شبع منها بدل رقمو و قطع علاقتو بيها و راح خطب وحدة كانت معاه و هي لي فرقتهم جارتي لعروسة تصدمت عيطتلي تبكي في حالة رحت نجري قاتلي شوفي واش دارلي بعد ما ريسكيت بزواجي و حياتي ع جالو انا قلتلها احسن هكا اتلهاي بدارك و راجلك و توبي ربي سترك احمديه مع الوقت حسيتها ندمت مي المشكل كي فاقت لقات بلي انا نعرف كل شي عليها مولاتش كيما قبل تقريبا عدت منشوفهاش حتى كي نروح لدار متهبطش و دارت فيا بزاف دعايات بلي راني نهدرلها غير علالحرام و انا لي سترتها ردني انا لي فيا و فيا المهم جرانا لي كانو اقرب الناس ليا و تربيت في دارهم ولاو يخزروني كي ندخل يحطوني فالتقيل حتى راجلها لي كان خويا و لا يكرهني قلت معليش .....و هي كي الملاك في وجهي عسل و في ظهري مسحت فيا كل شي عملاتو المهم دوك ولات داوي و تجري باه تهز الكرش و ولات تتمنى في طفل تحكم بيه بلاصتها و ربي زاد سترها و حملت و الله فرحتلها من قلبي و صفيت النية كي زيدت جابت طفل و سماتو ع اسم حبيبها يوسف و غير انا لي علاابالي درتلها قاطو و و رحت باركتها و ماما دارتلها غدا و كادو و نورمال مي هاد الشي كامل و الطفلة مزالها مكيودة مني عيطتلي قاتليحابة دير طهور تم انا دفنت سرها صح و قلت بلاك تابت و ندمت دوك خليها تفرح الله يسهل عليها .... ملغري عندها خواتاتها و امها ويلافتها انا هي لي هزيت معاها الصايبة تاع ولدها و فاتت بالضحك و الزهو كملت وش حبت و قاتلي يعطيك الصحة و نخلفهالك و هههههههه خلفتهالي غدوة عيطتلي قاتلي منحبكش تزيدي تجني خلاص .... حرت انا وش درت و الا كي كملت مصلحتها و ولدت .بعدما سترتها المهم جبت روحي حتى صباح الخير منقولهالهاش كيما حبت هي بعد 15 يوم تخطبت و فرحت و درت فاتحة عرضت الناس كامل الا هي بارسگو هي لي حبت و هنا ولات تهدر فيا من الغيرة و انا درت معاها غير الخير و كؤن حبيت نفضحها راني فضحتها مي نو انا سترتها خليتها و وكلت ربي بقيت انا نوجد لعرسي و هي كي لمكيودة دير فالشر مادراتش وش مخبيلها حثى لي سمعنا وحد اليلة عياط و صوت مرا تبكي و تقول و تحلف و هديك لمرا كانت هي نفسها لي درتها صاحبتي رماها راجلها و دخلناها باتت عندنا حتى لصباح جاو والديها داوها و دوك اي تشارع راح تطلق معندهاش حتى حق طالب بيه بارسكو راجلها تهمها بالخيانة الزوجية و لقا ادلة فتليفونها هي جاهلة كانت تحكي. مع صاحبها و التلفون يسجل و مافقثڜ وراجلها باع تلفون لصاحبو و لقا هداك السيد التسجل تاع الهدرة و جابو لراجلها تم بعد ما خلاهش حتى يبات و تفضحت بين الناس انا سترتها مي ربي كي حب يفضحها فضحها
هدي قصة حقيقية و بدلتلي حياتي و ستفدت منها بزاف و ندمت كي شاركتها فخيانة زوجها نسال ربي يغفرلها و يغفرلي و الحمدلله كي بعدت عليها و الا كانت لسقت فيا هاد التهمة
انا حكيت غير وش بيني و بينها محكيتش على نفاقها والعدوات لي دارتهم بين اهل زوجها و هي تضحك المهم نشاء الالله تكون عبرة لكل وحدة تلعبها قافزة ياسر و دير الشر ناسية بلي ربي لي يسير الامور ^^ .

الف مبروك زواجك وردة نتمنالك حياة زوجية سعيدة و ان شاء الله العقوبة للذرية الصالحة
و يا ريت لو ترجعي للمنتدى نستفادو منك و من مواضيعك الرائعة .

شكرا لك على الموضوع

الف مبروك زواجك وردة نتمنالك حياة زوجية سعيدة و ان شاء الله العقوبة للذرية الصالحة
و يا ريت لو ترجعي للمنتدى نستفادو منك و من مواضيعك الرائعة .
نتمنى ما نتحرم من مواضيعك وطلتك الباهية

شكرا وردة
بصراحة كنت انت العمود الفقري للمنتدى بداية من تأسيسه
و مزالت مواضيعك في جميع اقسام المنتدى تشهد لك
و يا ريت لو ترجعي للمنتدى نستفادو منك و من مواضيعك الرائعة
و اعادت الحيوية و النشاط للمنتدى فالمنتدى بدونك سابط و بدون طعم

شكرا لك وردة
تحية ليك و الى عائلتك